Desde o xoves na Facultade de Ciencias Económicas e Empresariais
A USC dedica unhas xornadas á economía circular
O Mestrado de Desenvolvemento Económico e Innovación da USC organiza esta semana unhas xornadas nas que persoal experto afondará nas implicacións da economía circular para o territorio e as cadeas de valor.
Facultade de Ciencias Económicas e Empresariais da USC.
O encontro, de entrada libre, inaugurarase este xoves 25 ás 9.30 horas na Facultade de Ciencias Económicas e Empresariais.
As xornadas internacionais ‘Economía circular, proximidade, territorio e cadeas de valor’, que contan coa colaboración da Deputación da Coruña, estruturaranse en tres bloques, dedicados á economía circular en Europa, a súa implicación para o territorio e as cadeas globais de valor e cadeas curtas.
Nos diferentes relatorios intervirá persoal investigador do grupo ICEDE, o catedrático de Enxeñería Química e vicerreitor de Planificación e Proxección Estratéxica da USC, Gumersindo Feijoo, ademais de especialistas como René Santamaría, da Universidade da Rioja; Kersty Hobson, da Cardiff University; Blandine Laperche, da Université du Littoral-Côte-d'Opale; Carlos Tapia, de TECNALIA Research & Innovation, e Raquel Haro, da Asociación Española de Recuperadores de Economía Social e Solidaria.
