A convocatoria de folga prodúcese como consecuencia do bloqueo das negociacións do convenio colectivo, tras 18 reunións, e do fracaso da mediación do AGA proposta pola patronal.  O secretario xeral de CCOO-Industria, Víctor Ledo, lembra que as condicións de traballo de 18 000 persoas dependen deste convenio, cos soldos «conxelados» desde hai tres anos. Desde CCOO, UGT e CIG critican que a patronal se negue a incluír no convenio aspectos como a subrogación do persoal, a articulación de mecanismos de fiscalización do labor das mutuas no tocante ao control da seguridade laboral dos traballadores, así como acordos sectoriais no convenio como o das auxiliares de Navantia. As organizacións sindicais tamén esixen unha cláusula de revisión salarial que garanta o poder adquisitivo por riba do IPC, a activación dos pluses de antigüidade e xefatura de equipo, un maior control sobre as ETT e chegar a unha porcentaxe mínima de contratos indefinidos do 60 %.

No que se refire ao primeiro dos paros convocados, o deste xoves, o secretario nacional da CIG-Industria, Xoan Xosé Bouzas, valorou como “un éxito” o seguimento, que nos polígonos e empresas con representación sindical foi de practicamente o 100%, ao igual que na grande empresa de maquinaria pesada, taller e reparación. “Nas empresas nas que non hai representación sindical o seguimento foi máis desigual e naquelas nas que os empresarios vulneraron o dereito á folga ameazando con medidas represivas foi a propia patronal a que non permitiu aos traballadores exercer o seu dereito a parar”. En todo caso, concluíu que tivo “un seguimento masivo” e engadiu que "se a patronal non se avén a negociar estes puntos a folga continuará nos próximos días”. De feito, está previsto repetir os paros os días 27 de xuño, 4 e 5 de xullo.

Seguimento en Santiago, A Coruña e Ferrolterra

O secretario comarcal da CIG-Industria de Compostela, Benedicto Blanco, tamén valorou moi positivamente a folga en Compostela. Ás seis da mañá xa había un piquete en Castrosua, onde parou o 100%, ao igual que as empresas do polígono do Tambre, apuntaba o sindicato. 

Mentres, na ca comarca de Ferrolterra, a CIG-Industria valoraba a folga como "altamente positiva", á vista da multitudinaria manifestación que percorreu ás rúas de Ferrol baixo a consigna "convenio do metal, solución". Unha marcha á que se sumaron os traballadores e traballadoras de Navantia. Mais a valoración positiva vén tamén por canto as empresas auxiliares do naval (Windar, Nervión, Tubacer, Acciona, Ferrovial, Elinco, Indasa, Soamar, Gabadi, Electro Rayma, Siasa, Bulbo, Serfrimec, etc.) e as de enxeñería secundaron a folga ao 100%. Neste senso, non hai que esquecer que unha das reivindicacións para este convenio é incorporar os acordos asinados para as auxiliares do naval no propio articulado do convenio.

De "rotundo éxito" tamén foi cualificado o seguimento da folga do metal na comarca da Coruña, onde os traballadores levaron as súas reivindicacións cunha numerosa concentración ás portas da sede da patronal. Como se agardaba, a incidencia do paro foi practicamente total nas empresas con maior volume de traballadores e produción.