A  Asociación Área Empresarial do Tambre (AAET) celebrará o acto de homenaxe o mércores, 14 de decembro, no salón de actos da súa sede do Centro Empresarial do Tambre, a partir das 20 horas. O evento será presentado por Manuel Nieto, vicepresidente da Asociación, que fará entrega aos homenaxeados dun diploma acreditativo e un pequeno agasallo. O acto estará presidido polo presidente de AAET, José Fernández Alborés, e contará coa asistencia de diversas autoridades, como o vicepresidente primeiro e conselleiro de Economía, Industria e Innovación, Francisco Conde; o alcalde de Santiago, Xosé A. Sánchez Bugallo, ademais dun representante da Deputación da Coruña e das empresas distinguidas.

A AAET distingue a capacidade de traballo que, ao menos, durante 25 anos veñen realizando estas empresas desde as súas naves no Polígono do Tambre. O presidente, José Fernández Alborés, explica que a asociación organiza este evento para enxalzar as particularidades e o bo facer de cada empresa, pero sempre destacando os “ingredientes comúns e imprescindibles” para o éxito empresarial que comparten todas as compañías, como son a ilusión, o esforzo e a colaboración. “As empresas mostran ao longo da súa traxectoria a ilusión por construír, por ver nacer e medrar o seu proxecto e consolidalo ou mesmo transmitilo a unha nova xeración, unha evolución alcanzada grazas a un gran esforzo na procura da competitividade, o mantemento da confianza dos clientes e un afán por innovar e reinventarse ano tras ano”, explica Alborés.

As oito empresas

• Balado y Torres é unha empresa dedicada á carpintería metálica e á cristalería, que nace en 1995 e evoluciona grazas á calidade dos seus produtos combinado coa última tecnoloxía e a atención ao cliente, que a fixeron merecedora da confianza de todos os seus clientes ao longo destes anos.
• Compostelana de Carnes sitúase na Vía Édison 13 do polígono do Tambre. Fundada en 1997, a actividade do Matadero Santiago céntrase no sacrificio de gando vacún, porcino e ovino, cunha vintena de empregados no seu cadro de persoal. 
• Grúas Tambre iniciou a súa andadura no ano 1997 no polígono industrial do Tambre coa intención de descentralizar a montaxe e servizo posvenda de Industrias Guerra S.A., cuxa sede está en Vila de Cruces (Pontevedra), empresa líder de fabricación propia de grúas forestais e mariñas de España que alcanzou recentemente o seu 70 aniversario. Elixiu o polígono do Tambre debido a súa situación estratéxica pola súa proximidade ás instalacións de importantes empresas madereiras, así como ás vías de acceso da AP-9 que facilitan a chegada aos diferentes portos de mar en que Guerra está presente.
• Radiadores Compos Ordóñez. A empresa foi fundada no ano 1952, pero é en 1978 cando José Seoane Puig se pon ao seu cargo, xa que naquel momento a empresa tiña sede no centro de Santiago. É en 1996 cando se traslada ao polígono do Tambre –Cidade do Transporte, B, número 111–, e prodúcese o cambio de domicilio e de razón social. A empresa realiza reparación e venda de todo tipo de radiadores, tanto de automóbiles como de maquinaria industrial ou agrícola, e tamén se dedica á reparación e limpeza de catalizadores e filtros de partículas.
• Redesyl nace en Boiro, en xaneiro de 1985, como empresa de  rehabilitación, revestimentos e impermeabilizacións. A súa delegación central está no polígono do Tambre, na Vía Pasteur 5, onde se atopa a oficina técnica e administrativa e o almacén de material das obras.
• Rodamientos e Hidráulica Gallega (Roehigal) cumpre este ano o 25 aniversario da súa instalación no Polígono do Tambre, na rúa da Cidade do Transporte D, 27. Lonxe queda xa ese 1 de xuño de 1988 cando comezaron coa súa andaina na rúa de Salgueiriños cunha proposta en subministración dirixida á industria en xeral e maquinaria de obras públicas. 
• Rodiauto. Fundada en 1988, Rodiauto nace cunha clara dedicación ao servizo da industria, naval, agrícola e obras públicas. Desde a súa fundación, serve subministracións industriais desde a súa sede en Santiago de Compostela, na Cidade do Transporte, C, 71, a empresas da área metropolitana e de toda Galicia, sempre mantendo a máxima calidade e rapidez para dar resposta a todas as necesidades dos clientes. 
• Talleres Antonio Vigo (Tavigosa) é unha empresa familiar, fundada en 1985 en Padrón (A Coruña) por Antonio Vigo Citoula, hoxe falecido, despois de ter dedicado unha longa traxectoria profesional ao mundo da venda e reparación de vehículos industriais e agrícolas. Tras ter pasado por distintas ubicacións de Santiago de Compostela como Boisaca e Vía Arquímedes no Polígono do Tambre, Talleres Antonio Vigo construíu en 2010 unhas novas instalacións máis modernas e funcionais no Polígono de Boisaca.