A conferencia de Conde será o vindeiro mércores, 22 novembro, no salón de actos da entidade a partir das 20 horas e con ela porase o peche ao ciclo de 2017, destinado a analizar a situación económica, social e cultural do país a través de personaxes de gran relevancia nos diferentes ámbitos.

Segundo ten manifestado o conselleiro, a Lei 5/2017, do 19 de outubro, de fomento da implantación de iniciativas empresariais en Galicia pretende facilitar o investimento e reducir á metade o prazo de tramitación para novos proxectos industriais. A normativa busca favorecer o investimento, a creación de empresas e a fixación de tecido industrial en Galicia, de modo que traerá consigo menos burocracia, maior axilidade administrativa e incentivos fiscais e financeiros.

Traxectoria

Francisco Conde (Monforte de Lemos, 1968) é licenciado e doutor en Ciencias Económicas e Empresariais pola Universidade Complutense de Madrid. Entre 1995 e 2009 foi profesor de Economía Aplicada na Universidade CEU San Pablo onde ocupou diferentes responsabilidades: director da aula de Estudos Europeos Robert Schuman, secretario do Instituto Universitario de Estudos Europeos, vicedecano da Facultade de Ciencias Económicas e Empresariais de 2002 a 2004, director de Relacións Internacionais de 2004 a 2005 e vicerreitor de Relacións Internacionais de 2005 a 2009.

Tras traballar como asesor do presidente da Xunta de Galicia de 2009 a 2012, foi nomeado conselleiro de Economía e Industria en decembro de 2012 e desde outubro de 2015 asume tamén as competencias en materia de Emprego.