Fundada en 1989, esta empresa familiar arzuá, leva máis de 30 anos sendo mestres queixeiros sen perder de vista a innovación e modernidade característica dunha nova xeración.

A xerente de Galicia Calidade, Ana Méndez, dependente da Consellería de Economía, Industria e Innovación destacou que os novos produtos certificados co selo caracterízanse por seren capaces de integrar “a orixe, a tradición, a calidade, o sabor e a sustentabilidade”.

A marca Galicia Calidade certifica a calidade dos produtos e servizos que, pola súa elaboración, pola súa materia prima ou deseño galegos, merezan esta distinción. Actualmente, son xa máis de 150 as empresas adheridas, e máis de 780 produtos ou servizos avalados con este selo, que engloban aos sectores agroalimentario, mar, turístico, xoieiro, industrial, xeotérmico e de planta ornamental.