"Tic Emprendes" opta a fondos europeos para a súa execución
A Deputación de Pontevedra impulsa un proxecto para fixar poboación moza no rural
A Deputación de Pontevedra impulsa “TIC Emprendes”, un proxecto que ten por obxectivo a fixación de poboación moza no rural a través do impulso de proxectos de emprego, autoemprego e emprendemento que permitan xerar oportunidades nestas zonas.
A Deputación de Pontevedra impulsa un proxecto para fixar poboación moza no rural
O programa vai dirixido a 390 persoas mozas.
TIC Emprendes”, unha iniciativa que a Deputación de Pontevedra presentou ao Proxecto Operativo de Emprego Xuvenil do Fondo Social Europeo, acaba de recibir o informe favorable da Xunta de Galicia.
Cun orzamento de 702.975 euros, céntrase en 31 concellos da provincia de Pontevedra con limitacións demográficas, principalmente o envellecemento, a perda de poboación e a dispersión xeográfica, e cunha renda percápita inferior á media da provincia e da Comunidade Autónoma. Así, está previsto que se beneficien do programa Agolada, Arbo, Barro, Campo Lameiro, A Cañiza, Catoira, Cerdedo-Cotobade,Covelo, Crecente, Cuntis, Dozón, Forcarei, Fornelos, A Illa de Arousa, A Lama, Meaño, Meis, Mondariz, Mondariz-Balneario Moraña, As Neves, Pazos, Ponte Caldelas, Pontecesures, Portas, Rodeiro, Oia, O Rosal, Silleda, Valga e Vila de Cruces.
En concreto, o programa vai dirixido a 390 persoas mozas, de entre 16 e 30 anos, residentes nestes concellos, incluídas as persoas con diversidade funcional, non ocupadas e non integradas nos sistemas de educación ou formación, que estean inscritas no Sistema Nacional de Garantía Xuvenil. O obxectivo do proxecto é que o 15% das persoas mozas participantes comecen unha iniciativa emprendedora, o 30% obteña un emprego e o 80% permaneza no seu lugar de residencia.
Accións formativas
Para acadar o obxectivo, cando “TIC Emprendes” reciba o visto bo dos fondos europeos ofertará á mocidade accións formativas enmarcadas en dez eixos temáticos específicos que serán completados cun módulo de formación no emprendemento, autoemprego e creación de empresas.
Máis polo miúdo, impartirase formación específica sobre programación web con software libre; creación e xestión de páxinas web; creación e xestión de tendas online; creación de aplicacións móbiles; creación de aplicacións de realidade virtual e realidade aumentada; creación de contidos dixitais; marketing dixital; análises de datos e Big Data; seguridade en redes informáticas e robótica.
Pola súa banda, en canto á formación de autoemprego e creación de empreas abordaranse cuestións como o Design Thinking, investigacion da contorna, esutods de mercado, idea e definición da proposta de valor, deseño do plan de negocio, definición de obxectivos, plan de marketing, plan de operacións, plan económico financiero e plan de implantación.
