Neste curso participan un total de 10 alumnas que recibirán 468 horas de formación nun área que responde ás necesidades do tecido empresarial da súa zona, co obxectivo de mellorar a súa empregabilidade e acadar a súa inserción laboral. Precisamente, segundo destacou o conselleiro de Economía, Francisco Conde, este é o obxectivo de Formación á porta, ofrecer cursos adaptados ás demandas das empresas achegándoas ás zonas do rural onde non existen centros de formación homologados. O programa estase desenvolvendo nun total de 27 concellos a través de 32 cursos nos que participan 480 menores de 30 anos.

Formación á porta enmárcase no Plan de formación e emprendemento no rural que conta cun total de 10 medidas para chegar a 13.000 persoas e no que se invisten 30 millóns de euros en iniciativas como esta ou como Aprol Rural ou Galicia Rural Emprende.

O conselleiro salientou a aposta que o Goberno galego está a realizar pola formación, que considera a chave que abre as portas á mellora da empregabilidade. Así o orzamento deste ano, destinado tanto a formación como a orientación, chega ata os 135 millóns de euros.

Conde finalizou explicando a importancia da colaboración institucional, especialmente entre a Administración autonómica e local, para coñecer as demandas e necesidades do tecido empresarial de cada zona e deseñar un plan de formación adaptado. Neste sentido, tamén se referiu aos Concellos Emprendedores e lembrou que estes terán prioridade á hora de acceder a varias das liñas de axuda da Xunta, como é o caso destes cursos de Formación á porta.