Con esta medida, a Xunta busca financiar un total de 207 axentes de emprego de desenvolvemento local, noutros tantos concellos galegos, para que contribúan á dinamización da economía local e á xeración de novas actividades no rural.

Trátase dunha figura especializada na promoción do emprego que ten como funcións principais colaborar de cara á creación de actividade empresarial, actuar como promotores desa actividade e servir de asesores puntuais de proxectos de empresa e como prospectores de mercado.

Desta maneira, a Xunta potencia o papel da Rede de Técnicos de Emprego de Galicia como motor do emprendemento e da creación de emprego co fin de apoiar a constitución de pequenas e medianas empresas, favorecendo un tecido empresarial máis estable, a diversificación de actividades e, sobre todo, un crecemento económico sostido.

Entre as actuacións desta Rede inclúense a promoción da igualdade de oportunidades e o acompañamento técnico no inicio de proxectos empresariais, ao mesmo tempo que colaboran con axentes de interlocución social e outros axentes públicos e privados para xerar redes de confianza.

O prazo de solicitude destas axudas permanecerá aberto ata o 6 de novembro.