En concreto, o Consello da Xunta avaliou a nova convocatoria para o fomento de enerxías renovables térmicas en administracións e entidades do terceiro sector, así como a ampliación da liña dirixida a empresas.

Alfonwso Rueda explicou que a previsión é que estas achegas “permitan mobilizar 33,4 millóns de euros” en investimentos para instalar “caldeiras de biomasa” ou sistemas “xeotérmicos, solares térmicos, de aerotermia” ou hidrotermia.

O presidente do Goberno autonómico asegurou que a través do uso desta enerxía renovable  búscase “acadar aforros de 3,6 millóns de euros ano na factura da electricidade” e poderanse reducir as emisións de CO2 “equivalentes á plantación de 1,3 millóns de árbores”. En canto ao consumo, a previsión é favorecer aforros anuais de 95.000 MWh/ano.

Convocatorias para administracións locais, entidades sen ánimo de lucro e empresas

A Xunta activará nas vindeiras semanas a liña dirixida a administracións locais, entidades públicas e tamén privadas sen ánimo de lucro. De concorrencia non competitiva, apoiará o uso de biomasa, xeotermia, hidrotermia, aerotermia e solar térmica con axudas que alcanzarán o 70 % de intensidade.

Por outra parte, amplíase o orzamento da convocatoria destinada a empresas para o uso do mesmo tipo de fontes renovables. Nesta liña, as axudas serán dun 35 % no caso de grandes compañías, un 40 % para as medianas e un 45 % no caso das pequenas.

Preténdese non só a redución dos custos enerxéticos e a mellora da calidade de vida ligada ao coidado medioambiental, senón tamén contribuír á dinamización económica e a un cambio cultural necesario para abordar a transición enerxética en todos os eidos.