Tras un ano de actividade desta iniciativa, un total de seis organizacións socias de Clusaga contan con apoio económico de Highfive para impulsar accións de dixitalización e sustentabilidade.

Este apoio provén de dúas convocatorias de axudas. A primeira delas ten o obxectivo de impulsar a aparición de novas cadeas de valor interrexionais e intersectoriais a través da twin transition verde e dixital, e da Industria 5.0. A segunda convocatoria desta liña está aberta dende mediados de xaneiro e aceptará propostas ata o vindeiro 28 de marzo.

O consorcio de Highfive recibiu, na súa primeira convocatoria, 58 propostas de empresas de 26 rexións europeas, das cales 7 foron de empresas galegas. Como resultado, 9 proxectos de innovación procedentes de 5 rexións diferentes foron seleccionados para recibir financiación, sendo 2 deles galegos.

O primeiro destes proxectos está a ser implementado por Queizuar, en colaboración con Anfaco-Cecopesca, que está a aplicar nas súas instalacións sensórica avanzada para a monitorización continua de parámetros de calidade en soro lácteo, para así optimizar o proceso de valorización.

O segundo proxecto escollido foi o de Glaücor Ingeniería que, coa colaboración de Aotech Optical Technologies, está a traballar en sistemas continuos de medición da humidade en manteiga a través de NIRS, para así automatizar o proceso de dosificación de auga.

Por outra banda, Highfive levou a cabo un proceso de ampliación de consorcio o que permitiu a Quescrem e TripleAlpha incorporar unha das súas iniciativas, que permite optimizar os procesos de fabricación mediante intelixencia artificial.