Co obxectivo de aumentar a competitividade das empresas do sector alimentario a través da I+D+i, estes “obradoiros 4.0” serviron para sensibilizar, detectar e promover a dixitalización a través da adopción e desenvolvemento de novas solucións dixitais baseadas en IA, IoT, blockchain ou xemelgo dixital, entre outras.

Estas sesións, exclusivas para empresas socias de Clusaga, contaron coa participación de Clavo Food Factory, Grupo Pereira, Real Conservera Española, Jamones González, FreshCut, Kiwi Atlántico, Queixerías Prestes, Novafrigsa, Cafés Candelas e Torre de Nuñez. 

O evento celebrado no Edificio FEUGA supuxo o peche desta iniciativa tras tres sesións de traballo grupais. Nelas afondouse nas oportunidades que ofrece a dixitalización en distintos eidos, tales como datos industriais, sustentabilidade e operacións de interoperabilidade e rastrexabilidade.

Asimesmo, realizáronse auditorías individualizadas entre as empresas participantes, nas que se detectaron máis de 40 proxectos de I+D+i, tanto individuais como colaborativos. Estos poderán dar pé tanto á implementación de solucións de alta eficiencia para cubrir as necesidades das empresas, como a novas oportunidades de negocio para competir no mercado con solucións innovadoras e de alto valor.

Coma broche final, a última sesión apostou pola difusión do coñecemento, poñendo en contacto ás 10 empresas participantes nesta iniciativa con outras 10 empresas tecnolóxicas baixo unha fórmula de speed networking.

Deste modo, a xornada serviu para aliñar as necesidades detectadas nas empresas alimentarias coas máis avanzadas tecnoloxías que desenvolven outras empresas socias de Clusaga.

Apoio en proxectos

Tras a participación das empresas alimentarias nos “obradoiros 4.0”, Clusaga continúa coa súa labor a favor da industria alimentaria, brindando apoio integral ás empresas involucradas na presentación de propostas de proxectos de I+D+i que dean resposta ás necesidades a través do Servicio Innpulsa.

Innpulsa, a través da súa modalidade Innpulsa Proxecta, abrangue o apoio ao longo de todo o ciclo de vida dun proxecto de innovación, dende a entrevista para determinar de forma personalizada o alcance, pasando pola detección das mellores axudas dispoñibles ou a busca de provedores, así como o soporte na redacción e presentación da proposta, ou a coordinación do proxecto en caso de concesión.