A segunda das catro xornadas previstas para 2024 terá lugar en colaboración coa EFA Piñeiral Centro de Formación Profesional de Arzúa, os días 14 e 15 de marzo. Nesta ocasión, a temática elixida é a importancia de aplicar técnicas e accións estratéxicas de comunicación e de márketing para potenciar e mellorar as vendas dos produtos agroalimentarios. Durante dous días, os asistentes debatirán sobre como traballar a presentación e identidade do produto como eixo vertebrador da estratexia de comunicación e venda.

A xornada conta cunha primeira parte de divulgación do emprendemento en economía social no sector agroalimentario e charlas sobre aspectos innovadores de mellora da competitividade das empresas agroalimentarias, así como cunha mesa redonda con entidades sociais do sector agraolimentario que aplican a innovación de produto nos seus plans de negocio. O segundo día, as xornadas cerraranse coa visita a unha entidade de economía social da contorna.

As xornadas da Fundación Juana de Vega teñen como finalidade contribuír ao desenvolvemento da cultura do emprendemento e das habilidades innovadoras no sector de produción e transformación de alimentos con modelos produtivos baseados na economía social que xeren no só impacto económico no medio senón tamén un impacto social e ambiental positivo no territorio.

Trátase tamén de mellorar a competitividade das empresas agroalimentarias a través de varios obxectivos: coñecer os elementos máis relevantes dunha estratexia de comunicación e de márketing; así coma coñecer as novas tendencias de comunicación, deseño, presentación e márketing online e offline dos produtos agroalimentarios. Asemade, as xornadas axudarán a crear sinerxías entre os centros educativos colaboradores e as empresas agroalimentarias da zona, así como entre o alumnado dos centros e o ecosistema empresarial da comarca.

Destinatarios

As xornadas, que contan con 10 prazas dispoñibles, están dirixdas a produtores primarios locais que poden incrementar a rendibilidade da súa explotación con novas ideas de negocio vinculadas a pequenas transformacións a escala artesanal e produtos alimentarios de calidade, así como a propietarios ou traballadores de pemes agroalimentarias interesados en abordar novos desenvolvementos innovadores, e ao propio alumnado das escolas participantes, que poden ser futuras persoas emprendedoras, ben como remuda das explotacións familiares ou como traballadores das entidades do sector agroalimentario.

As inscricións realízanse desde a web da Fundación Juana de Vega.