Este programa difundirase desde o Centro GaiásTech, inaugurado este ano na Cidade da Cultura de Santiago, e que se configura como o elemento central e coordinador do ecosistema dixital de Galicia e da súa relación co resto da economía galega na procura dunha competitividade duradeira e xerando espazos de integración e inclusión dixital e de desenvolvemento persoal do noso talento dixital. O programa conta con espazos de networking, de debate, opinión e coñecemento, invitando a expertos en distintas materias para que realicen unha exposición seguindo un programa específico no que reflectirán, en catorce minutos, tres principios sobre dita temática de cara a establecer un coloquio posterior cos participantes.

O taller do martes versará sobre “A Cidade das TIC: Dixitalización e transformación dixital”, e estará impartido polo reitor da Universidade da Coruña (UDC), Julio Abalde. Celebrarase por streaming ás 15:00 horas. Abalde é reitor da UDC desde 2016, así como presidente da Comisión Sectorial da Conferencia de Reitores das Universidades Españolas CRUE-Xerencias. Tamén é presidente da CIXUS e de FEUGA. É catedrático de Microbioloxía e doutor pola Universidade de Santiago de Compostela (USC). Xunto coa súa actividade docente, desenvolveu un labor investigador e a autoría de artigos de investigación, sendo autor de máis de 85 artigos de investigación, 60 deles publicados en revistas internacionais de referencia, cinco libros, once capítulos de libros e dirixiu oito teses de doutoramento.

Cara a conectividade do futuro

A segunda sesión celebrarase o mércores 20 e tratará da “Tecnoloxía 5G: cara a conectividade do futuro” e estará impartida por Eduard Martín, director de conectividade intelixente en Mobile World Capital Barcelona desde xaneiro de 2019 onde dirixe e coordina o Observatorio Nacional de 5G e a iniciativa 5G Barcelona. Celebrarase por streaming ás 15:00 horas.

Martín é Enxeñeiro en Informática e Enxeñeiro Técnico en Informática de Sistemas pola Universitat Oberta de Catalunya, e Diplomado en Tecnoloxías da Información por Cambridge (UCLES). Posúe un certificado en xestión da innovación por IESE e conta cunha experiencia de máis de 30 anos no sector TIC, tanto na o ámbito público como no privado.

Traballou durante máis de 25 anos para o Concello de Barcelona, concretamente, no Instituto Municipal de Informática. Posteriormente, incorporouse a Sopra Steria, unha consultoría internacional focalizada na transformación dixital, na que desenvolveu o cargo de director estratéxico para o sector público durante algo máis dun ano. Posto que retomou como director de Smart Cities e estratexia para o sector público en España. Ademais, é decano do Ilustre Colexio de Enxeñaría Informática de Cataluña e presidente da Asociación de Profesionais TIC de Cataluña.

tres14.pm

O programa tres14.pm forma parte dunha ampla axenda que a AMTEGA está a promover desde o centro Gaiástech, onde a tecnoloxía convertese no vector do cambio das nosas organizacións que poden dar respostas innovadoras e cun alto valor engadido ás demandas da nosa sociedade. Para coñecer a axenda de actividades pódese facer accedendo ao portal dixital www.gaiastech.xunta.gal.