Anabel Gulas, concelleira de Promoción Económica e da Cidade, departamento que encargou o traballo, sinala que "os datos a nivel global son bos e alentadores a nivel demográfico”. A edil pontevedresa ve no traballo da Universidade de Vigo, dirixido polo profesor Pedro Figueroa, un informe de 250 páxinas que recolle 185 indicadores básicos, unha ferramenta útil para avanzar no desenvolvemento da cidade. “Agora temos unha visión obxectiva, un sustento cuantitativo para avaliar e deseñar políticas de actuación e corrixilas se é preciso” subliñou.

É unha opinión compartida polo director do Observatorio, Pedro Figueroa, quen resumía a diagnose nos seguintes termos: “ Pontevedra ten (respecto ás outras cidades galegas) unha posición xeral media-alta, cun 83% de indicadores positivos, especialmente no referente á cohesión social e a indicadores demográficos e económicos como os da evolución do emprego ou a creación de empresas”.

A evolución do paro e do emprendemento, por unha banda e o alto nivel de formación da poboación, por outra son cuestións que sorprenderon en positivo ao investigador universitario. Tamén amosou a súa sorpresa polo nivel medio de renda: “pensei que era máis alto pola forma de vivir e o nivel de consumo dos pontevedreses”.

Segundo os datos recollidos, algúns cun histórico de entre 5 e 10 anos, Pontevedra tamén aparece ben situada no ránking en canto á débeda do Concello, soamente por detrás de Vigo.