Fegacons, a patronal galega da construción, anunciaba este xoves en rolda de prensa que a partir do venres 18 as empresas do sector terían que parar pola falta de subministracións a raíz da folga de transportes.

A este respecto, a executiva nacional da Federación de Construción e Madeira (FCM) da CIG lembra que a Organización Internacional do Traballo (OIT) define o peche patronal como "o peche total ou parcial dun ou máis lugares de traballo, ou a obstaculización da actividade normal dos empregados/as, por un ou máis empregadores/as coa intención de forzar ou resistir demandas ou expresar queixas,ou apoiar a outros empregadores nas súas demandas ou queixas".

A resposta a nivel internacional é diversa, mais en España, suliñan desde a CIG, a xurisprudencia non o recoñece como dereito fundamental e só o xustifica nos casos de risco de "violencia para as persoas e as cousas,;ocupación ilegal do centro de traballo ou polo volume da inasistencia ou irregularidades do traballo", ningún destes casos se produce nestes momentos, alegan desde a central sindical.

Se ben a CIG pode comprender que a situación externa e interna cause problemas no sector, “tamén cremos que existen outras medidas para afrontar a situación actual, coma o artigo que existe en todos os convenios do sector que permite a recuperación de horas non traballadas por causas coma, entre outras, a propia falta de subministros, ou nos casos máis extremos, incluso o ERTE”. Porén, a medida que se optou é a máis asumíbel e prexuizosa para a clase traballadora, “que queda nunha completa incerteza ante o que vai pasar”.