Desde a sección sindical da CIG no BBVA, promotora das mobilizacións de protesta celebradas este martes fronte a dúas sucursais do banco en Vigo, consideran que non non existen motivos para prescindir de persoal (estímase que o ERE afectaría 3.000 empregados), tendo en conta que a entidade presentou unha conta de resultados con 1.320 millóns de euros de beneficios no cuarto trimestre de 2020, e que a venda da súa filial en Estados Unidos lle supuxo unha achega de 8.500 millóns de euros. “E non hai que esquecer que foi o persoal que agora queren despedir o que realizou unha ímproba labor durante a pandemia, e que segue a realizar a día de hoxe, dando a cara diante da clientela, a mesmaclientela á que queren expulsar das oficinas, e da que collen os aforros e acribillan a comisións”, explican nun comunicado.

Diante disto, a CIG anuncia que a central sindical estará presente mesa de negociación “para pelexar polos postos de traballo, pois no banco non sobra ninguén; máxime tendo en conta que a clientela segue demandando servizos presenciais e atención directa por persoas, pese aos procesos de dixitalización forzada e forzosa á que a quere someter o banco”. Mais adiantan que seguirán a mobilizarse para denunciar “as actuacións inmorais” do banco e na defensa do emprego.

Dende a sección sindical da CIG no BBVA denuncian que a entidade financeira ten en marcha unha política de restricións de servizos que afecta gravemente á clientela e coa que pretenden xustificar os despedimentos, como o cobro de dous euros de comisión a quen retira efectivo da propia conta, restriccións no horario ou eliminación do servizo de caixa das oficinas, peche oficinas e redución dos postos de atención á clientela, ou a problemática das colas, "unha falta de respecto cara a clientela; estar de pé pasando frío, calor, baixo a choivaou con xeada é inhumano. Normalmente quen sufre esta situación é a xente maior. Cando se fai para que a clientela se aburra e opte pola banca dixital é repugnante", critica o sindicato..