Aesgall organizou neste 2019 actividades nas que combinou o fomento da visibilidade da asociación e das entidades que a integran e a formación das súas asociadas. A participación na Comisión Institucional do Pacto Local polo Emprego da cidade da Coruña; a II Feira da Economía Social; o XIX Encontro de Emprendedoras e Empresarias, organizado pola Fundación Mujeres; o grupo de traballo sobre Dinamización demográfica e benestar, de cara á elaboración do Plan estratéxico 2021-2030 da Xunta de Galicia; a xornada "Novas Economía: é colaboración todo o que que parece?", promovida pola Unión de Cooperativas Galegas; o Programa de Fomento da Economía Social, a Innovación e o Desenvolvemento Sustentable na Galiza Rural 2019-2020 dirixido ao alumnado de ensino medio e universitario, posto en marcha por Daveiga, sociedade laboral socia, recentemente, foron algúns exemplos.

En relación ao funcionamento propio de AESGAL, ademais dos labores de apoio ás empresas asociadas e de diálogo con diferentes entidades e organismos, activouse un punto de asesoramento na Coruña, no Accede Papagaio, durante os meses de maio a xullo, e aprobouse a incorporación á Cooperativa de servizos financeiros Coop57. Ademais, presentouse a axenda sectorial Industrias creativas e culturais en Galicia e Norte de Portugal, no marco do proxecto  LACES, en Santo Tirso, Portugal, e en dous actos na cidade de Pontevedra, un en xuño, no que tamén se presentou a axenda mediombiental, e outro en novembro, no Culturgal.

Sen dúbida, este ano suporá un antes e un despois no sector da economía social galega trala constitución do Foro pola Economía Social Galega por parte de Aesgal, Agaca, Aeiga, Cegasal e EspazoCoop. Desde o Foro promoveuse o ciclo de Economía Social Meetings, dentro dos cales esta asociación puxo en marcha un, arredor das liñas de financiamento que ofrece a Fundación Goteo, que se presentou por primeira vez na comunidade. Tamén baixo o paraugas desta unión, publicouse o Manual Divulgativo da Economía Social en Galicia.

Ademais, Galicia foi nomeada Rexión Amiga da Economía Social por parte da Comisión Europea.

Obxectivos para 2020

Con este panorama, o obxectivo de AESGAL para o vindeiro ano, en palabras da súa xerente, “é seguir medrando como asociación, e así contar coa forza necesaria para continuar apoiando ás sociedades laborais asociadas, ofrecéndolles máis servizos e atendendo ás súas necesidades”. Un traballo a prol da consolidación desta fórmula empresarial, no que o selo "Facendo Empresa" xoga un papel fundamental, como apunta Berta Lema: “queremos que a marca Facendo Empresa, que creamos para poñer en valor a filosofía e o xeito de traballar das sociedades laborais, sexa un selo coñecido e recoñecido polo que representa”.